لن اتحدث عن حرب دائرة في الشيشان و لا في العراق و لا حتى في الصومال….

للاسف هذه حرب تدور رحاها يوميا في شوارع عمان … من شرقها الى غربها ومن ابونصير في القطب الشمالي حتى تصل الى بكبات وقلابات سحاب..

نشارك جميعا بها ونشحذ سياراتنا يوميا في الصباح ونقوم بالاستعداد بربط الحزام على صدورنا وكاننا نحتمي بترس.. ونمسك الستيرنج ونوجهه الى صدور اعدائنا وننطلق برعاية الله وحفظه على صوت تهليلات و تكبيرات الاذاعات المحلية من اقصى اليمين الى اقصى الشمال…

طبعا يجب ان تعقد الحاجبين وتضع ال Glasses وتشوفلك حدا على هالصبح تطق حنك معو… وتفتح الو وتبلش تبرم…

ومن ثم تبدأ المعركه بالتجاوز دون غماز وقطع الاشارات و التجاوز عن اليمين .. واكيد السيارات الصفراء رح تبعد عنها وتحكي التكسي اللي بيجيك من الريح تجاوز عنو.. لانو ببساطه اذا شاف دينار (راكب) رح يوقف فجأة  حتى لو انو ما شي 100 كم/ساعه… مهو مش مشكله الحق على الل ورا دائما..

ويا حبيبي اذا حدا بدو يقطع الشارع …يا برمي حالو قدام السيارة و اللي بدو يصير يصير.. او انو الحزين بكون جديد على عمان و بطلع عليه فجر اليوم الثاني وهو واقف في محله..

اما اذا اطلقت لزامورك العنان واعترضت على احدهم لقيامه بمخالفة احد بديهيات السواقة … فتبدأ لغة الاشارات في العمل…  وتبدأ الالسن بشحذ الهمم وبتوزيع السباب هنا وهناك و قد يصل جدك السابع جزءاً منها … وقد تتطور الامور وتخرج الايدي من الشبابيك ليعطيك اشارة تطعيم عن بعد ..وبذلك يضغط على الزر الاحمر بالنسبة لك… وساعتها قامة القيامة .. والحقوا يالربع ….

ومن الملفت للنظر ان كل منا يحتفظ بسلاحه السري تحت الكرسي…  واذا انسحبت القنوة من تحت الكرسي بصير عيب ترجع الا اذا فشختلك اثنين ثلاث وسال الدم عليها … وساعتها الله يستر من الفزعات و الباصات اللي رح تيجي من هون و هناك…

في نهاية النهار تعود الى ادراجك اما سالما معافى تستقبل بالزغاريد وبنثر الورود والحمدلله على السلامة و ماعليك شر….

او لا سمح الله تكون من جرحى هذه الحرب اثخنتك الشتائم او شوية كدملات على بودي السيارة …

وفي كلتا الحالتين … فان المتحاربين يتقاتلون طوال النهار وفي الليل يخلدون الى بيوتهم لاخذ قسطا من الراحه لتبزغ شمس الصباح مؤذنةً بحرب جديدة ويوم جديد … وربنا يستر…